ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅល្ងាចថ្ងៃទី១០ ខែកញ្ញា ឆ្នាំ២០១៨នេះ បានប្រាប់និស្សិតខ្មែរ ដែលសិក្សានៅក្រុងណាននីង ខេត្តក្វាស៊ីង ប្រទេសចិនថា ការដាក់ឲ្យលោក កឹម សុខា ស្ថិតនៅក្រៅឃុំបណ្តោះអាសន្ន នៅថ្ងៃនេះគឺដោយសារបញ្ហាសុខភាព។
សម្តេចតេជោ ហ៊ុន សែន បានអះអាងបែបនេះ ក្នុងពិធីសំណេះសំណាលជាមួយនឹងនិស្សិតខ្មែរជាង២០០នាក់ ក្នុងឱកាសដែលសម្តេចអញ្ជើញទៅចូលរួមការតាំង ពិព័រណ៍នៅក្នុងទីក្រុងនេះ រយៈពេល៣ថ្ងៃ ចាប់ពីថ្ងៃទី១០ ដល់ថ្ងៃទី១២ ខែកញ្ញា ឆ្នាំ២០១៨។
ក្នុងឱកាសសំណេះសំណាលនោះ សម្តេចបានលើកឡើង ទាក់ទិនទៅនឹងការដាក់ពិរុទ្ធជន កឹម សុខា ឲ្យនៅក្រៅឃុំដែលធ្វើឡើងកាលពីព្រឹកព្រលឹមថ្ងៃទី១០ កញ្ញា ដោយសារហេតុផលសុខភាពរបស់ លោក កឹម សុខា។ ជាមួយនឹងការថ្លែងបែបនោះដែរ សម្តេចនាយករដ្ឋមន្ត្រីមានប្រសាសន៍សង្កត់ធ្ងន់ថា ការនៅក្រៅឃុំរបស់ពិរុទ្ធជន កឹម សុខា គឺស្ថិតនៅក្រោមការតាមដានយ៉ាងយកចិត្តទុកដាក់ពីសំណាក់តុលាការ។
សម្តេចតេជោ ហ៊ុន សែន បានបង្ហើបពីលិខិតរបស់ពិរុទ្ធជន កឹម សុខា ក្នុងការសុំការជួយអន្តរាគមន៍ពីស្ថាប័នក្រសួងមហាផ្ទៃ ក្នុងជួយការពារសុខសុវត្ថិភាពចំពោះរូបលោក កឹម សុខា បើទោះបីស្ថិតក្នុងមន្ទីរឃុំឃាំង ឬចេញនៅក្រៅឃុំ ក៏ដោយ។
បើតាមលិខិតរបស់លោកកឹម សុខា ដែលសរសេរផ្ទាល់ដៃ បានស្នើដល់អគ្គស្នងការនគរបាលជាតិ ជួយការពារសុវត្ថិភាពរបស់លោកផង ។ ក្នុងសារលិខិត មានខ្លឹមសាថា “យោងតាមការសម្រេចឲ្យនៅក្រៅឃុំខ្លួន បណ្តោះអាសន្ន និងដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការ របស់ចៅក្រមស៊ើបសួរ ខ្ញុំបាទ កឹម សុខា សូមស្នើសុំឯកឧត្តមអគ្គស្នងការនគរបាលជាតិមេត្តា ជួយការពារសុវត្ថិភាពរបស់ខ្ញុំ ដោយក្តីអនុគ្រោះ”។
គួរបញ្ជាក់ថា លោក កឹម សុខា អតីតប្រធានគណបក្សសង្គ្រោះជាតិ ត្រូវបានតុលាការសម្រេចដោះលែងឲ្យនៅក្រៅឃុំបណ្តោះអាសន្ន នៅវេលាទៀបភ្លឺឈានចូលថ្ងៃទី១០ ខែកញ្ញា ឆ្នាំ២០១៨នេះ ដោយសារតែបញ្ហាសុខភាពរបស់លោក បន្ទាប់ពីឃុំខ្លួននៅក្នុងពន្ធនាគារត្រពាំងផ្លុង (ម៣) រយៈពេលជាង១ឆ្នាំ។
ទាំងមេធាវីលោក កឹម សុខា ទាំងអ្នកនាំពាក្យសាលាដំបូងរាជធានីភ្នំពេញ ក៏សុទ្ធតែបានអះអាងថា ទោះពីជាមានការដោះលែងឱ្យនៅក្រៅឃុំក៏ដោយ ក៏សំណុំរឿងក្បត់ជាតិរបស់លោក កឹម សុខា នៅតែបន្តអនុវត្តទៅតាមនីតិវិធី។ ជាមួយគ្នានេះ លោក កឹម សុខា ក៏ត្រូវបានដាក់ឱ្យស្ថិតនៅក្រោមការត្រួតពិនិត្យតាមផ្លូវតុលាការ ដោយភ្ជាប់នូវលក្ខខណ្ឌមួយចំនួនផងដែរ៕ ដោយ ៖ បញ្ញាស័ក្តិ
