ភ្នំពេញ ៖ លោកអភិបាលរាជធានីភ្នំពេញ បានណែនាំដល់មន្ត្រីនគរបាល ខិតខំប្រឹងប្រែង ក្នុងការបម្រើសេវាសាធារណៈ ជូនប្រជាពលរដ្ឋ ស្របទៅនឹងគោលនយោបាយរបស់ រាជរដ្ឋាភិបាលអាណត្តិទី៦ ដែលបានដាក់ចេញធ្វើយ៉ាងណាខិតខំបម្រើសេវាជូនប្រជាពលរដ្ឋ ដើម្បីកុំឲ្យពួកគាត់មានការថ្នាំងថ្នាក់។
លោកឃួង ស្រេង ក៏បានព្រមានចាត់វិធានការតាមច្បាប់កងកម្លាំង ចំពោះមន្ត្រីនគរបាល ក្នុងរាជធានីភ្នំពេញ ដែលអសកម្ម ក្នុងការបម្រើសេវាជូន ប្រជាពលរដ្ឋ។
នៅរសៀលថ្ងៃទី១១ ខែកញ្ញា ឆ្នាំ២០១៨នេះ នៅស្នងការដ្ឋាននគរបាលរាជធានីភ្នំពេញ លោកឧត្តមសេនីយ៍ឯក ស ថេត ត្រូវបានប្រកាសចូលកាន់តំណែង ជាស្នងការនគរបាលរាជធានីភ្នំពេញថ្មី ខណៈលោកនាយឧត្តមសេនីយ៍ ជួន សុវណ្ណ ត្រូវបានព្រះ មហាក្សត្រត្រាស់បង្គាប់តែងតាំង ជាអនុប្រធានអាជ្ញាធរជាតិប្រយុទ្ធប្រឆាំងគ្រៀងញៀន មានឋានៈស្មើរដ្ឋមន្ត្រី ។
លោក ឃួង ស្រេង បានមានប្រសាសន៍ថា ស្នងការថ្មីត្រូវមើលបញ្ហានេះឲ្យបានខ្លាំងក្លា ខណៈដែលនេះជាបញ្ហាមួយត្រូវតែនាំគ្នាធ្វើឲ្យបានល្អ ពីព្រោះនេះជាតម្រូវការរបស់ប្រជាពលរដ្ឋ។
ស្នងការនគរបាលរាជធានីភ្នំពេញ និងជាអគ្គស្នងការរងនគរបាលជាតិ លោកឧត្តមសេនីយ៍ឯក ស ថេត បានធ្វើការប្ដេជ្ញាចិត្តយ៉ាងមុតមាំ ក្នុងការគោរពនូវបញ្ជានានា ថ្នាក់ដឹកនាំ ដើម្បីបម្រើផលប្រយោជន៍ជូនជាតិ ក៏ដូចជាប្រជាពលរដ្ឋឲ្យបានល្អប្រសើរ រួមទាំងប្រតិបត្តិឲ្យបានម៉ឺងម៉ាត់ចំពោះរដ្ឋធម្មនុញ្ញនិងបទបញ្ញាតិផ្សេងៗទៀត ។
លោកឧត្តមសេនីយ៍ឯក ស ថេត បានអះអាងថា ប្ដេជ្ញាអនុវត្តន៍យ៉ាងស្មោះត្រង់បំផុតចំពោះជាតិ សាសនា ព្រះមហាក្សត្រ គោរព និងប្រតិបត្តិយ៉ាងម៉ឺងម៉ាត់ ចំពោះរដ្ឋធម្មនុញ្ញ នៃព្រះរាជាណាចក្រកម្ពុជា គោរព និងអនុវត្តន៍តាមកម្មវិធីនយោបាយចតុកោណ ដំណាក់ កាលទី៤ របស់រាជរដ្ឋាភិបាល ប្រតិបត្តិយ៉ាងម៉ឹងម៉ាត់ និងដោយសច្ចធម៌ ចំពោះមុខច្បាប់ និងបទបញ្ញត្តិផ្សេងៗ របស់ថ្នាក់ដឹកនាំគ្រប់លំដាប់ថ្នាក់ យកអស់កម្លាំងកាយចិត្តនូវគំនិតប្រាជ្ញា ដើម្បីបម្រើសេវាសាធារណៈជូនដល់ប្រជាពលរដ្ឋ រក្សាសាមគ្គីភាពផ្ទៃក្នុង និងអង្គភាពពាក់ព័ន្ធផ្សេងៗទៀត ឲ្យបានល្អប្រសើរបន្ថែមទៀត ។
លោកស្នងការនគរបាលរាជធានីភ្នំពេញ បន្ថែមទៀតថា ដើម្បីសម្រេចបានការងារថ្មីៗ ត្រូវមានការចាំបាច់សហប្រតិបត្តិការ ពីសំណាក់ ថ្នាក់ដឹកនាំគ្រប់លំដាប់ថ្នាក់ ជាមួយស្ថាប័នពាក់ព័ន្ធនានា ដែលមានកងកម្លាំងប្រដាប់អាវុធ អាជ្ញាធរមូលដ្ឋាន អង្គការជាតិ-អន្តរជាតិ ក្នុងការសំដៅឆ្លុះបញ្ចាំងអំពីចំណុចអវិជ្ជមានមួយចំនួន ដើម្បីធានាអនុវត្តន៍ឲ្យមានប្រសិទ្ធភាពខ្ពស់ និងទទួលបានជោគជ័យដ៏ត្រជះត្រចង់ផងដែរ ។
លោកឧត្តមសេនីយ៍ឯក ស ថេត បានបញ្ជាក់ទៀតថា កត្តាដែលនាំឲ្យរាជធានីភ្នំពេញមានសន្តិសុខ សុវត្ថិភាព និងសណ្ដាប់ធ្នាប់បានល្អ គឺជាជោគជ័យ នៃការអនុវត្តគោលនយោបាយ របស់រាជរដ្ឋាភិបាល ដំណាក់កាលទី៤ និងការអនុវត្តទិសដៅ ដែលក្រសួងមហាផ្ទៃ និងអគ្គស្នងការដ្ឋាននគរបាលជាតិបានដាក់ចេញ ៕ ដោយ ៖ បញ្ញាស័ក្តិ
