ភ្នំពេញ ៖ សម្ដេចក្រឡាហោម ស ខេង បានណែនាំឲ្យថ្នាក់ដឹកនាំក្រសួងមហាផ្ទៃ ត្រូវពង្រឹងការងារគ្រប់គ្រង គណបក្សនយោបាយ សមាគម និងអង្គការមិនមែនរដ្ឋាភិបាល ព្រមទាំងពង្រឹងការតាមដាន ការអនុវត្តឲ្យបានត្រឹមត្រូវ តាមច្បាប់ជាធរមាន និងលក្ខន្តិកៈ។
សម្ដេចក្រឡាហោម ស ខេង នាយករដ្ឋមន្ត្រីស្តីទី នៅព្រឹកថ្ងៃទី១២ ខែកញ្ញា ឆ្នាំ២០១៨នេះ បានអញ្ជើញជាអធិបតី ក្នុងពិធីប្រកាសចូលកាន់តំណែង រដ្ឋលេខាធិការ អនុរដ្ឋលេខាធិការ អនុប្រធានអាជ្ញាធរជាតិប្រយុទ្ធប្រឆាំងគ្រឿងញៀន អគ្គនាយក អគ្គាធិការ និងបំពាក់ឋានន្ដរស័ក្ដិ ថ្នាក់នាយឧត្តមសេនីយ៍ ជូននាយនគរបាលជាតិជាន់ខ្ពស់ ក្រសួងមហាផ្ទៃ។ ពិធីនេះរៀបចំឡើងនៅទីស្តីការក្រសួងមហាផ្ទៃ ដោយមានការចូលរួមពីមន្ត្រីជាន់ខ្ពស់ ក្រសួងមហាផ្ទៃ។
សម្ដេចក្រឡាហោម ស ខេង បានប្រកាសថា គណបក្សណាដែលចង់ផ្លាស់ប្ដូរប្រធាន ត្រូវតែធ្វើសមាជ ឬមហាសន្និបាត ដើម្បីស្របទៅច្បាប់ដែលបានកំណត់ មិនមែនផ្ញើត្រឹមលិខិតមកក្រសួងមហាផ្ទៃតែមួយមុខនោះទេ។
សម្ដេចក្រឡាហោម ស ខេង បានថ្លែងថា ប្រសិនបើគណបក្សមួយមិនបានធ្វើសមាជ ឬមហាសន្និបាត ដើម្បីបោះឆ្នោត ផ្លាស់ប្ដូរប្រធានគណបក្សថ្មីនោះទេ គេមិនមែនហៅថាផ្លាស់ប្ដូរស្របតាមផ្លូវច្បាប់ឡើយ គេហៅថា ការធ្វើបក្សប្រហារ។
សម្ដេចក្រឡាហោម ស ខេង បានថ្លែងយ៉ាងដូច្នេះថា “ឧបមាថា កាលណាចង់ដូរប្រធានបក្ស ត្រូវតែមានសមាជ ឬមហាសន្និបាត ហើយមហាសន្និបាតធ្វើរបៀបមិច អ្នកណាកោះហៅ ឬបោះឆ្នោតលើកដៃ ឬបោះឆ្នោតជាសំងាត់។ ប៉ុន្ដែដល់ពេលគាត់ធ្វើ គាត់មិនធ្វើចឹង គាត់ចេញក្រដាសមួយ ដូរប្រធានបក្ស។ នេះគេហៅថាធ្វើបក្សប្រហារហើយ ដែលថ្មីៗនេះមានគណបក្សមួយធ្វើចឹង រហូតមានអ្នកមិនសុខចិត្តស្រែកមកក្រសួងមហាផ្ទៃ ឲ្យជួយមើល”។
សម្ដេច ស ខេង បានមានប្រសាសន៍ថា មិនដូចការគ្រប់គ្រងអង្គភាពណាមួយនោះទេ ក្រសួងមហាផ្ទៃ គ្រាន់តែទទួលការពិនិត្យតាមសំណើរ របស់គ្រប់បណ្ដាគណបក្សនយោបាយ ដើម្បីឲ្យស្របតាមរដ្ឋធម្មនុញ្ញ ច្បាប់ស្ដីពីគណបក្សនយោបាយ ច្បាប់ស្ដីពីអង្គការមិនមែនរដ្ឋាភិបាល និងស្របតាមច្បាប់បទដ្ឋានដទៃផ្សេងទៀត ដែលកំពុងតែមានជាធរមាន នៅក្នុងប្រទេសកម្ពុជា៕ ដោយ ៖ កូឡាប
