កំពង់ស្ពឺ ៖ ដោយអនុវត្ដតាមបញ្ជាដឹកនាំដ៏ខ្ពង់ខ្ពស់ លោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ សមត្ថកិច្ចសហការឃាត់បានជនសង្ស័យម្នាក់ករណីចោរកម្មលួចម៉ូតូមួយគ្រឿងនៅត្រង់ចំណុចភូមិត្រពាំងមាន ឃុំស្នំក្រពើ ស្រុកគងពិសី ខេត្តកំពង់ស្ពឺ នៅថ្ងៃទី១១ ខែឧសភា ឆ្នាំ២០២៦ វេលាម៉ោង៣ទាបភ្លឺ ។
ជនសង្ស័យម្នាក់ដែលត្រូវសមត្ថកិច្ចធ្វេីការឃាត់ខ្លួនរួមជាមួយម៉ូតូមួយគ្រឿង ម៉ាកHonda Dream C125 ឆ្នាំ២០១៩ ពណ៌ខ្មៅពាក់ផ្លាកលេខស្វាយរៀង1N-9476 នៅចំណុចភូមិអន្លង់រមៀត ឃុំអន្លង់រមៀត ស្រុកកណ្តាលស្ទឹង ខេត្តកណ្តាល មានឈ្មោះ ម៉ា នាង ភេទប្រុស អាយុ៣៨ឆ្នាំ បច្ចុប្បន្នរស់នៅភូមិពុំឥដ្ឋ ឃុំព្រៃក្រពើក ស្រុកគីរីវង្ស ខេត្តតាកែវ (ម៉ូតូខាងលេីរបស់ជនរងគ្រោះ ឈ្មោះ ហ៊ន់ សុខជា ភេទប្រុសរស់នៅភូមិព្រៃរកា ឃុំដូនស ស្រុកស្វាយជ្រំ ខេត្តស្វាយរៀង ដែលបញ្ឍរទុកក្បែរកន្លែងលក់ដូរនៅលើផ្លូវជាតិលេខ៣)។
តាមការបញ្ជាក់ពីលោកវរសេនីយ៍ឯក យ៉ាង សុខលី អធិការនគរបាលស្រុកគងពិសី បានអោយដឹងថាក្រោយទទួលព័ត៌មានករណីចោលួចម៉ូតូ លោកបានបញ្ជាអោយគ្រប់បណ្ដាប៉ុស្ដិ៍នគរបាលរដ្ឋបាលដែលនៅជិតកន្លែងកេីតហេតុសហការបន្ទាន់និងរាយការណ៍បន្ដសុំកិច្ចសហការពីស្រុកជាប់ព្រំប្រទល់ពិនិត្យលេីភិនភាគជនសង្ស័យដែលបានប្រព្រឹត្ដបទល្មេីស និងមធ្យោបាយដែលបានបាត់ពីជនរងគ្រោះដេីម្បីស្នេីសហការចាប់ ទេីបទទួលបានលទ្ធផលដូចពេលនេះ ករណីខាងលេីសមត្ថកិច្ចបាននាំយកជនសង្ស័យមកកាន់អធិការដ្ឋាននគរបាលស្រុកគងពិសីសួរនាំនិងកសាងសុំណុំរឿងបញ្ជូនទៅការិយាល័យព្រហ្មទណ្ឌខេត្ដ ចាត់ការតាមនីតិវិធីបន្ដ៕រក្សាសិទ្ធដោយ៖សុទ្ធលី
