អ្នកទោសប្រមាណពាក់កណ្ដាលក្នុងចំណោមអ្នកទោសទាំងអស់៥៦០នាក់នៅPalu បានគេចខ្លួនរួច បន្ទាប់ពីជញ្ជាំងគុកបានដួលរលំក្រោយការរញ្ជួយដី។
តាម Reutersនោះ ពួកប៉ូលិសយាមការពារគុកពិតជាពិបាកក្នុងការទប់ស្កាត់មិនឱ្យអ្នកទោសរត់ ពីព្រោះពួកគេក៏ភ័យស្លន់ស្លោ ព្រោះត្រូវសង្គ្រោះខ្លួនឯងសិន។ពួកគេថែមទាំងគ្មានពេលរាយការណ៍ប្រាប់ថ្នាក់លើទៀតផង។
អ្នកទោសជាង២៨០នាក់បានគេចខ្លួនរួចនៅ Palu ហើយអ្នកទោស១០០នាក់ផ្សេងទៀតក៏បានរំដោះខ្លួនរួចចេញពីគុកនៅ Donggala ។
គួររំលឹកថា ការរញ្ជួយដីកម្រិត ៧,៥Richter នៅសមុទ្រជិតកោះSulawesi កាលពីព្រលប់ថ្ងៃទី២៨កញ្ញា បានបង្កជារលកស៊ូណាមិ ទឹកមានកម្ពស់ដល់ទៅជិត៦ម៉ែត្រ ធ្វើឱ្យតំបន់ឆ្នេរសមុទ្រនៃទីក្រុងPaluនិងប្រជុំជន Donggala បានរងការបំផ្លិចបំផ្លាញយ៉ាងធ្ងន់ធ្ងរ។
តាមសមត្ថកិច្ចប្រទេសនេះឱ្យដឹងថា មនុស្សស្លាប់អាចកើនដល់រាប់ពាន់នាក់ ខណៈពេលសាកសពមកទល់ពេលនេះទើបប្រមូលបានជាង៨០០នាក់ ក្នុងពេលដែលតំបន់មួយចំនួនក្រុមសង្គ្រោះពុំអាចទៅដល់ព្រោះតែស្ពានបាក់និងផ្លូវខូចខាត៕
លីសា