ភ្នំពេញ: យោងតាមរបាយការណ៍របស់ គណៈកម្មាធិការជាតិសុវត្ថិភាពចរាចរណ៍ផ្លូវគោក នៃ អគ្គនាយកដ្ឋាននគរបាលជាតិ ចុះកាលបរិច្ឆេទ ថ្ងៃ ១១ ខែ សីហា ឆ្នាំ ២០២៦ បានឱ្យដឹងថា: នៅក្នុងឆមាសទី១ ក្នុង ឆ្នាំ២០២៦នេះ សមត្ថកិច្ចនគរបាលចរាចរណ៍ នៃ អគ្គនាយកដ្ឋាននគរបាលជាតិ នៃ ក្រសួងមហាផ្ទៃ បានអនុវត្តវិធានការរឹតបន្តឹងច្បាប់ចរាចរណ៍ផ្លូវគោក ដោយបានផាកពិន័យយានយន្តល្មើសច្បាប់សរុបចំនួន ១៤.៨៦៧គ្រឿង នៅទូទាំងប្រទេស។
របាយការណ៍បានបញ្ជាក់ថា: នៅក្នុងចំណោម យានយន្ត ទាំងនោះ ទោចក្រយានយន្ត ឬម៉ូតូ និង ត្រីចក្រយានយន្ត មាន ៩.៣៤៤គ្រឿង ភាគច្រើនល្មើសដោយសារមិនពាក់មួកសុវត្ថិភាព មាន ៦៣% បើកបរក្នុងស្ថានភាពស្រវឹងមាន ២៣ % មិនគោរពសញ្ញា ១៣ % និង គ្មានផ្លាកលេខសម្គាល់១ % ។
ចំណែកឯ រថយន្ត មាន ចំនួន ៥.៥២៣គ្រឿង ក្នុងនោះរថយន្តធុនធ្ងន់មាន៧០គ្រឿង ខណៈអត្រាល្មើស មានជាអាទិ៍ បើកបរលើសល្បឿនកំណត់ ៤៧% បើកបរក្នុងស្ថានភាពស្រវឹង ៣៤ % មិនគោរពសញ្ញាចរាចរណ៍ ១២% គ្មានបណ្ណបើកបរ ៥% និង គ្មានផ្លាកលេខសម្គាល់ ២% ។
ក្រៅពីការផាកពិន័យនៅនឹងកន្លែង សមត្ថកិច្ចនគរបាលចរាចរណ៍ ក៏បានដកពិន្ទុបណ្ណបើកបរ និងពិន័យតាមរយៈឧបករណ៍បច្ចេកទេសសរុប ១៥.២១០នាក់ ក្នុងនោះមានស្ត្រី ២.២២៦នាក់។
ការដកពិន្ទុទាំងនោះរួមមាន ដកពិន្ទុ ៣៩៥ពិន្ទុលើអ្នកបើកម៉ូតូល្មើសចំនួន ៩.៤៦៧គ្រឿង ដកពិន្ទុ ១០.៤១០ពិន្ទុលើអ្នកបើកបររថយន្តធុនស្រាលចំនួន៥.៦៣២គ្រឿង និងដកពិន្ទុ៨៧ពិន្ទុ លើអ្នកបើកបររថយន្តធុនធ្ងន់ចំនួន១១១គ្រឿង។
ដល់ចំនួនកំណត់មួយ សមត្ថកិច្ចនិងដកហូតបណ្ណបើកបរទាំងនោះតែម្ដង។
របាយការណ៍នេះ ក៏បានបញ្ជាក់ ទៀតថា: នៅ ក្នុងឆមាសទី១ ឆ្នាំ២០២៦ គ្រោះថ្នាក់ចរាចរណ៍កើតឡើងសរុប ១.២៧៩លើក បណ្ដាលឱ្យមនុស្សស្លាប់ ៧៧៣នាក់ និង របួសធ្ងន់ ស្រាលសរុប ១.៩៤៤នាក់។
សម្រាប់មូលហេតុដែលបង្កឱ្យមានគ្រោះថ្នាក់រួមមាន: បើកបរលើសល្បឿនកំណត់ ៤៦ % មិនគោរពសិទ្ធិអាទិភាព ២២ % មិនប្រកាន់ស្ដាំ ១២% បើកបរដោយ ប្រជែងគ្រោះថ្នាក់ មាន៧% បត់មិនប្រយត្ន៦% បើកបរក្នុងស្ថានភាពស្រវឹង ៤% មិនគោរពសញ្ញាចរាចរណ៍២% និង កត្តាយានយន្ត១% ៕រក្សាសិទ្ធិគ្រប់យ៉ាងដោយ CEN
