រឿងរ៉ាវដ៏គួរឲ្យរន្ធត់ និងអាសូរបំផុតមួយ ដែលត្រូវបានបង្ហោះចូល Group ហ្វេសប៊ុកក្នុងស្រុកមួយកាលពីព្រឹកមិញនេះ អ្នកលេងអ៊ិនធើរណែតម្នាក់ឈ្មោះ Susmita បានចែករំលែកបទពិសោធន៍ដ៏រន្ធត់មួយ ដែលនាងបានជួបប្រទះកាលយប់រំលងអាធ្រាត ។
Susmaita អាយុ ២៣ ឆ្នាំ ជានិស្សិតស្រីម្នាក់រៀននៅសកលវិទ្យាល័យអ៊ិស្លាមអន្តរជាតិ បានចែករំលែករូបភាព និងសរសេរឲ្យដឹងថា កាលពីវេលាម៉ោង ១ និង ៤៥ នាទី ព្រឹកថ្ងៃទី១៧ នាង និងមិត្តភក្តិរបស់នាង កំពុងដើរទៅផ្ទះនៅជិតខាងសាលាស្ថិតក្នុង Bangsar ។ ប៉ុន្តែ ខណៈពេលដែលពួកគេកំពុងដើររវាងផ្លូវ Jalan Terasek 3 និង 6 ពួកគេក៏ប្រទះនឹងបុរសម្នាក់វ័យខ្ទង់ ៤០ ឆ្នាំ ដោយមានកាំបិតនៅនឹងដៃរបស់គាត់គួរឲ្យខ្លាចតែម្តង ។
ដូចការព្រួយបារម្ភជាមុន ស្រាប់តែភ្លាមៗនោះ បុរសរូបនោះចាប់មិត្តភក្តិរបស់ Susmita ដោយបានយកកាំបិតដាក់កាត់នឹងបំពង់.ករបស់នាង ហើយគំរាមអារ.កនាង ប្រសិនជានាងហ៊ានតែស្រែក ។ ទោះយ៉ាងណា ស្ថិតក្នុងស្ថានភាពដ៏ភ័យខ្លាចយ៉ាងនេះ មិត្តភក្តិរបស់នាងក៏បានស្រែកឡើង បណ្តាលឲ្យបុរសរូបនោះចាក់.ករបស់នាងតែម្តង ។
ដើម្បីរំដោះខ្លួនចេញ មិត្តរបស់ Susmita បានបន្តស្រែកឡើងខ្លាំងឲ្យគេជួយ និងរត់ចុះតាមផ្លូវមួយ ខណៈបុរសបុរសនោះបានបន្តចាប់ Susmita ជំនួស ។ គាត់បានទាមទាររកលុយពីនាង ប៉ុន្តែ បានរត់ចេញទៅកាន់ផ្លូវ Jalan Terasek 6 ភ្លាមៗ បន្ទាប់ពីឆែកឆេរពុំឃើញមានអ្វីនៅជាប់នឹងខ្លួនរបស់នាង ។
ខណៈមិត្តភក្តិរបស់ Susmita ឈាមហូរស្រោចខ្លួន ពួកគេទាំងពីរក៏បន្តស្រែកហៅគេឲ្យជួយ ដោយសង្ឃឹមថានឹងមានអ្នករស់នៅផ្ទះក្បែរនោះ ចេញមកជួយពួកគេ ។ ប៉ុន្តែ ជាអកុសល ពុំមាននរណាម្នាក់ចេញមកជួយសង្គ្រោះពួកគេនោះទេ ។
នាងសរសេរនៅក្នុងផុសយ៉ាងដូច្នេះថា៖ «មិត្តភក្តិរបស់ខ្ញុំឈាមហូរស្រោចខ្លួនសាហាវណាស់ ។ ពួកគេបានសុំការជួយពីផ្ទះជិតៗខាង ព្រោះតែពួកយើងមានអារម្មណ៍ពុំសុវត្ថិភាពក្នុងការដើរ ទៅកាន់ផ្ទះរបស់ពួកយើងទៀតទេ ។ ប៉ុន្តែ ពិតជាហួសចិត្តណាស់ ខណៈមួយចំនួននៃពួកគេ បានចេញពីក្នុងផ្ទះ និងបិទទ្វារទៅវិញ ។ ម្នាក់ក្នុងចំណោមនោះនិយាយថា ‘ទៅកាន់ផ្ទះដទៃទៀតទៅ!!’» ។
ទោះយ៉ាងណា ឥលូវនេះ ពួកនាងបានដាក់ពាក្យបណ្តឹងទៅកាន់ប៉ូលីសរួចហើយ ដើម្បីស្វែងរកជនដៃដល់មកកាត់ទោសឲ្យបានធ្ងន់ធ្ងរ ៕
ដោយ៖ ចន្ទី
ប្រភព៖ Worldofbuzz