វេជ្ជបណ្ឌិតដែលគេសង្ស័យជាអ្នកបំបែកសាកសពយ៉ាងយង់ឃ្នងលើអ្នកកាសែតKhashoggi ធ្លាប់បានហាត់ការនៅមូលដ្ឋានសុខាភិបាលមួយ នាទីក្រុងMelbourne, Australia។
អ្នកកាសែតKhashoggi អ្នកកាសែតJamal Khashoggi បានបាត់ខ្លួនជាងពីរសប្តាហ៍ហើយ ហើយរដ្ឋការតួកគីជឿថាលោកត្រូវបានសម្លាប់បន្ទាប់ពីបានចូលទៅស្ថានកុងស៊ុលSaudi Arabiaនៅ Istanbul កាលពីថ្ងៃទី២ខែតុលា ។
Daily Mail បានដកស្រង់សម្តីសមត្ថកិច្ចតួកគីឱ្យដឹងថា វេជ្ជបណ្ឌិតSalah al-Tubaigy គឺជាមនុស្សម្នាក់ក្នុងចំណោមបុរស៥នាក់ដែលមានវត្តមានក្នុងស្ថានកុងស៊ុល Saudi Arabiaនាថ្ងៃនោះ ។
មានរបាយការណ៍ជាច្រើនឱ្យដឹងថា វេជ្ជបណ្ឌិត«ពេជ្ឈឃាត»ថែមទាំងប្រាប់អ្នកដែលទៅជាមួយឱ្យញ៉ុកត្រចៀក នាពេលដែលខ្លួនគេធ្វើការបំបែកសាកសព។សមត្ថកិច្ចតួកគីនូវបានឱ្យដឹងបន្ថែមថា វេជ្ជបណ្ឌិតal-Tubaigy មានរណារអារឆ្អឹងមួយ។
តាមសាស្ត្រាចារ្យNoel Woodford នាយកវិទ្យាស្ថានកោសលវិច័យវេជ្ជសាស្ត្រVictoria (Melbourne, Australia) បានបញ្ជាក់ប្រាប់ថា លោកal-Tubaigy ធ្លាប់បានធ្វើការស្រាវជ្រាវកោសលវិច័យនៅស្ថាប័នលោករយៈពេល៣ខែចាប់តាំងពីខែមិថុនាឆ្នាំ២០១៥ ។ ចំណាយទាំងអស់នៃការស្រាវជ្រាវនេះរដ្ឋាភិបាលSaudi Arabia ជាអ្នកទូទាត់។
គេក៏បានដឹងថា វេជ្ជបណ្ឌិតរូបនេះធ្លាប់បាននិយាយក្នុងអំឡុងធ្វើកម្មសិក្សានៅAustralia ថាខ្លួនគេចូលចិត្តកិច្ចការរុករកកំណត់អត្តសញ្ញាណជនរងគ្រោះនៅក្នុងមហន្តរាយធំៗ។
នៅអំឡុងឆ្នាំ២០១៥នោះ វេជ្ជបណ្ឌិតរូបនេះគឺជាមេដឹកនាំនៃស្ថាប័នកោសលវិច័យSaudi Arabia ហើយតាមដឹងបច្ចុប្បុន្នជាមន្ត្រីជាន់ខ្ពស់ក្នុងក្រសួងមហាផ្ទៃ Saudi Arabia។
ការពាក់ព័ន្ធវេជ្ជបណ្ឌិតរូបនេះត្រូវបានគេដឹងតាមរយៈខ្សែអាត់ថតសំឡេងក្នុងនាឡិកា Appleរបស់ជនរងគ្រោះ។ក្នុងខ្សែអាត់ថតសំឡេងរយៈពេល៧នាទីនេះគេអាចឮសូរសំឡងរបស់លោកal-Tubaigy ស្រែកបញ្ជាអំឡុងពេលបំបែកសាកសពអ្នកកាសែតKhashoggi ។
តាមកាសែតTime ផ្សាយថ្ងៃទី១៧ខែតុលា មានជនល្មើស៣នាក់ផ្សេងទៀតត្រូវបានចាត់ទុកថាពាក់ព័ន្ធដល់ករណីនេះគឺ៖ Abdulaziz Mohammed al-Hawsawi (សមាជិកកងសន្តិសុខរបស់មហាក្សត្រMohammed )Thaar Ghaleb al-Harbi និង Muhammed Saad Alzahrani (សមាជិកកងអង្គរក្សមហាក្សត្រSaudi Arabia )៕សូយន
