ក្រុមរុករកសញ្ជាតិអង់គ្លេសពីរនាក់បងប្អូនបង្កើត Ian Wilson និង Jack បានសម្រេចចិត្តផ្អាកការរុករកយន្តហោះបាត់ខ្លួន MH370 នៅតំបន់ភ្នំ Phnom Aoral ក្រោយពីពួកគេជួបប្រទះនូវឧបសគ្គជាច្រើន រួមទាំងការប៊ិះអស់ជីវិតផង។
តាមទីភ្នាក់ងារសាព័ត៌មាន Sputnik បងប្អូនត្រកូល Wilsonទាំងពីររូបបានសម្រេចចិត្តផ្អាកយុទ្ធនាការស្វែងរក MH370 របស់ខ្លួន។
កាលពីសប្តាហ៍មុន ត្រកូលWilson ទាំងពីរនាក់នេះបានចាប់ផ្តើមដំណើររុករកក្នុងចម្ងាយផ្លូវព្រៃប្រមាណ៨គីឡូម៉ែត្រឆ្ពោះទៅកាន់ទីតាំង MH370 ដែលពួកគេរកឃើញរូបភាពវាតាមរយៈ Google Maps ។តាមអ្នកទាំងពីរ ទីតាំងរបស់ MH370 ស្ថិតនៅ Phnom Aoral ដែលជាកំពូលភ្នំខ្ពស់បំផុតនៅប្រទេសកម្ពុជា។ ផ្លូវដែលពួកគេបានធ្វើដំណើរ គឺត្រូវទម្លុះឆ្លងតំបន់ព្រៃក្រាស់ សម្បូរទៅដោយជ្រោះជ្រលងដងអូរ និងផ្ទាំងថ្មធំៗ។
ត្រកូលWilsonទាំងពីរ ត្រូវបានប្រជាជននៅតំបន់នោះជួយនាំផ្លូវដើរកាត់ព្រៃឆ្លងកាត់ជ្រោះ រំលងផ្ទាំងថ្មធំៗ។ ដំណើរប៉ុន្មានថ្ងៃ បានធ្វើឱ្យពួកគេទាំងពីររងរបួសពេញខ្លួន។ប៉ុន្តែពេលទៅដល់តំបន់មួយនោះ ប្រជាជននៅតំបន់ដែលជាអ្នកនាំផ្លូវបានទូន្មានពួកគេថាពុំគប្បីចូលជ្រៅទៀតទេ ហើយគួរលះបង់កិច្ចប្រឹងប្រែងរុករកយន្តហោះនេះទៅ។
Ian Wilson បានពោលប្រាប់Daily Star online របស់អង់គ្លេសថា ៖«យើងខ្ញុំបានរងរបួសជាច្រើន ការរអិលដួល និងដំណើរដែលទាមទារឱ្យតោងទាញឡើង ពិតជាធ្វើឱ្យពួកខ្ញុំឈឺចាប់។ជើងរបស់ខ្ញុំបានរងបួស ជង្គង់ក៏ឈឺ។យើងទាំងពីរបានឆ្លងកាត់ជ្រោះប្រហែល២០ យើងបានដួល តែសំណាងល្អមិនបាត់បង់ជីវិត ដោយទង្គិចនឹងផ្ទាំងថ្ម ឬត្រូវចរន្តទឹកកួចយកទៅ»។ លោកប្រាប់បន្ថែមថា លោកមោទនភាពនឹងបងប្រុស ព្រមទាំងអ្នករួមដំណើរជាមួយ។
ឥឡូវយើងនៅរង់ចាំការបញ្ជាក់របស់ Daily Star online ដែលជាម្ចាស់កម្មសិទ្ធិផ្តាច់មុខសម្រាប់ការផ្សាយអំពី ដំណើររុករកនេះបន្តទៀតដើម្បីដឹងប្រាកដថានេះជាការផ្អាកដំណើររុករក ឬបញ្ឈប់វាទាំងស្រុង៕លីសា
