នេះជាហេតុការណ៍ចាត់ទុកថាដ៏កម្រមួយ ដែលបុរសជាឪពុកក្មេកម្នាក់នៅក្នុងប្រទេសម៉ាឡេស៊ី បានវាយដុំទៅកូនប្រសារប្រុសរបស់គាត់ ដោយមិនឲ្យតដៃបានឡើយ បន្ទាប់ពីបុរសរូបនោះត្រូវបានចោទប្រកាន់ថាបានប្រើអំពើហិង្សាមកលើប្រពន្ធរបស់ខ្លួន ដែលជាកូនស្រីបង្កើតរបស់គាត់ ។
យោងតាម World of Buzz ឪពុកក្មេកនោះត្រូវបានដកស្រង់សម្តី ដោយនិយាយលើកឡើងក្នុងចំណោមរឿងរ៉ាវផ្សេងៗទៀតថា៖ «តើឯងកំពុងសុំទោសខ្ញុំមែនទេ? ចុះនៅពេលឯងវាយធ្វើបាបកូនស្រីរបស់ខ្ញុំ តើឯងមានបានប្រាប់នាងនូវពាក្យ សុំទោសទេ? អ្នកឯងគិតថា ខ្ញុំជាមនុស្សបណ្តែតបណ្តោយរឿងរ៉ាវនេះកើតឡើងតាមតែអំពើចិត្តបែបនេះមែនទេ? តើឯងមានដឹងថា ឯងបានធ្វើបែបនេះជាទង្វើដ៏ខុសឆ្គងទេ? មើលទៅឯងហាក់ដូចជាពុំកោតខ្លាចញញើតខ្ញុំសូម្បីបន្តិចឡើយ មែនទេអ្ហា! ប្រសិនឯងពូកខាងវាយដុំមនុស្ស ក្រោកឡើង ហើយវាយខ្ញុំឥឡូវហ្នឹងមក ឡើងមក វ៉ៃខ្ញុំមក!» ។
ឪពុកក្មេករូបនេះ ក៏បានបន្តស្រែកឡើងទាំងកំហឹងថា៖ «តើខ្ញុំចិញ្ចឹមកូនស្រីរបស់ខ្ញុំតាំងពីតូចមក រហូតដល់ធំដឹងក្តី សម្រាប់តែទទួលការវាយធ្វើបាបចឹងមែន? ខ្ញុំបានព្រមានអ្នកច្រើនដងរួចហើយ ខ្ញុំបានអនុញ្ញាតឲ្យកូនស្រីខ្ញុំរៀបការជាមួយឯងដោយទឹកចិត្តស្រលាញ់បំផុត ប៉ុន្តែ ខ្ញុំមិនអនុញ្ញាតឲ្យឯងធ្វើបាបនាងបែបនេះឡើយ ចូរចាំណា៎!!» ៕ ដោយ៖ ឧត្តម (ប្រភព៖ Nextshark, WorldofBuzz)