Sunday, November 28, 2021

ប្រធាន​កិច្ចការ​នយោបាយ​របស់ UN ធ្វើដំណើរ​ទស្សនៈ​ដ៏​កម្រ​ទៅ​កូរ៉េខាងជើង ខណៈ​ស្ថានភាព​កំពុង​តឹនតឹង​

លោក Jeffrey Feltman ប្រធាន​កិច្ចការ​នយោបាយ​របស់​អង្គការសហប្រជាជាតិ​បាន​ធ្វើ​ដំណើរ​ទស្សនៈកិច្ច​ដ៏​កម្រ​ទៅ​កាន់​ទីក្រុង​ព្យុងយ៉ាង​នៅ​ថ្ងៃ​អង្គារ​នេះ​។ នេះ​បើ​តាម​ការចេញផ្សាយ​របស់ BBC​។​

​នេះ​គឺជា​ការធ្វើ​ដំណើរ​ទស្សនៈ​កិច្ច​លើកដំបូង​បំផុត​របស់​មន្ត្រី​ជាន់ខ្ពស់​អង្គការសហប្រជាជាតិ​ទៅកាន់​កូរ៉េខាងជើង​ក្នុង​រយៈពេល ៦​ឆ្នាំ​ចុងក្រោយ​នេះ​។​

លោក Jeffrey Feltman ប្រធានកិច្ចការនយោបាយរបស់អង្គការសហប្រជាជាតិ

​ដំណើរ​ទស្សនៈកិច្ច​នេះ​កើតឡើង បន្ទាប់​ពី​កូរ៉េ​ខាងជើង​បាន​ធ្វើការ​បាញ់​សាកល្បង​បាន​ជោគជ័យ​នូវ​មី​ស៊ី​ល​រយៈ​ចំងាយ​ឆ្ងាយ​កាល​ពី​សប្តាហ៏​មុន ដែល​រដ្ឋ​កុម្មុនិស្ត​នេះបាន​អះអាងថា មី​ស៊ី​លអាច​មាន​សមត្ថភាព​វាយប្រហារ​អា​មេ​រិច​បាន​ទាំងមូល​។​

Jeffrey Feltman ដែល​ជា​អតីត​អ្នកការទូត​អា​មេ​រិច និង​ជា​មន្ត្រី​អា​មេ​រិច​ជាន់​ខ្ពស់​បំផុត​នៅ​អង្គការ​សហប្រជាជាតិ នឹង​ស្នាក់នៅ​ទីក្រុង​ព្យុង​យ៉ាង​រហូតដល់​ថ្ងៃ​សុក្រ​។ ដំណើរ​ទស្សនៈកិច្ច​នេះ​ក៏​គាប់​ជួន​ផងដែរ ខណៈពេល​អា​មេ​រិច និង​កូរ៉េខាងត្បូង​កំពុង​ធ្វើ​សមយុទ្ធ​ដែនអាកាស​ទ្រង់ទ្រាយ​ធំ​បំផុត​ដែល​មិន​ធ្លាប់​មាន​ពីមុនមក​។​

​បើ​តាម​អ្នកនាំពាក្យ​អង្គការសហប្រជាជាតិ​បានឲ្យដឹងថា លោក Jeffrey Feltman នឹង​ធ្វើ​ការជួបពិភាក្សា​ជាមួយនឹង​មន្ត្រី​ជាន់ខ្ពស់​កូរ៉េខាងជើង រួមមាន រដ្ឋមន្ត្រីការបរទេស Ri Yong-ho និង​ធ្វើ​ការពិភាក្សា​ជា​លើ​បញ្ហា​គោលនយោបាយ​ស្តីពី​បញ្ហា​ផលប្រយោជន៏ និង​កង្វល់​របស់​គ្នា​ទៅវិញទៅមក​។​

យន្តហោះបំបាំងកាយអាមេរិចប្រភេទ F-22 ដែលនឹងចួលរួមធ្វើសមយុទ្ធរួមជាមួយកូរ៉េខាងត្បូង

​លោក​នឹង​មិន​មាន​គំរោង​ជួប​ជាមួយ​មេដឹកនាំ​កំពូល​កូរ៉េខាងជើង គីម ជុង​អ៊ុន​នោះទេ​។​

​ដំណើរ​ទស្សនៈកិច្ច​របស់លោក កើតឡើង​ក្នុង​កំឡុងពេល​មាន​ភាព​តានតឹង​កាន់តែ​ខ្លាំង​ដោយសារតែ​ការបាញ់​សាកល្បង​មី​ស៊ី​ល​ឆ្លង​ទ្វីប​របស់​កូរ៉េខាងជើង ដែល​ទទួលរង​ការ​ថ្កោលទោស​យ៉ាងខ្លាំង​ពី​សហគម​ន៏​អន្តរជាតិ​៕ សុភ័ក្ត្រ​